؛؛مدخل؛؛
كـانـك تبـي تسهر وترهق جفونك
عـلـى مـشـب الحب نوخ مطاياك
خذها تبي تسعد وتطرب عيونك
وأحــيــان لاوالله تــظـهر خفاياك
صباحكم شعر
أضع بين ايديكم هذه القصيده الجديده
واتمنى ان تنال على اعجابكم
(((ضميااان جوفي)))
أشعلت بوصالك خفوت القناديل
وأطفيت في كبد الهواوي غليله
لوكنت عرضه للشقا والبهاذيل
وشلون أوصف حالتي للجميله
ياوجد حالي لاسرى تالي الليل
أقنب قنيب الذيب وأعول عويله
العين تشكي للرموش المظاليل
والقلب يشكي للغنوج الكحيله
ضميان جوفي للشفايا الشهاليل
بردان جسمي يالغلا عزتي له
بالجوف شوق مارضخ للتعاليل
لا قلت هيد شب راس الفتيله
ياقلب لاشفت الطواري مقابيل
قل له تسلي بالرجاوي قبيله
خل الجروح تزول معها التفاصيل
والهم لاينفض علينا شليله
وسطي قبايل تصطفق بالمداهيل
وأن شفتها صارت بجوفي قبيله
ياللي زبنتي من عنا الهم والويل
قلبي سلومه مايبور بدخيله
الطيب يبقى والنوايا دواليل
والموت أخير من الردى والفشيله
والله حشا مانقبل اللمس والميل
وأن مال حظي بالصبر نرتكي له
مدي يدينك ماقطعنا المواصيل
الوقت يسرق والليالي بخيله
أحيان أسلي خاطري بالتماثيل
يالله عسى ماشوفتك مستحيله
تدرين وش معنى الجفا؟؟متعب الحيل
أنا أشهد أنه علقم حنضليله
حلمي وأشوفه بالليالي المقابيل
ألقى يديني في يدين الجميله
؛؛مخرج؛؛
يـــومٍ مـعــك وايــام مــايــعــرفونك
تقعد تحسب بالخفا وش خطاياك
بــ يــرد قـلـبـك خـلـهـم ينفعونك
هذا الجواب اليوم ماهو ولياك